कबीर सा का भजन

टेर

सुरता क्यों नैणो भरमावे रे, थारे हाथ कबीरो नहीं आवे
ठगनी क्यों नैणो भरमावे रे, थारे हाथ कबीरो नहीं आवे

• आबासूं तो आई अप्सरा कबीरा ने रिझावे रे
  तीन लोके में फिर फिर आवे हमे कबीरा थारी वारी रे || १ ||

• रूपो पहन रूप दिखावे सोनो पहर रिझावे रे
  भरी जवानी में फिरे भटकती हरि गुण क्यों नहीं गावे रे || २ ||

• इन्द्र बरसे धरती भीजे पत्थर रो काई भीजे रे
  मत कर ठगणी अटका झटका कबीरो कदे नहीं भीजे रे || ३ ||

• ब्रह्मा मोया विष्णु मोया शंकर जटाधारी रे
  पहाड़ों मायेला अवदूतो मोया हमे कबीरा थारी वारी रे || ४ ||

• जात जुलाहो नाम कबीरो मै काशी रो वासी रे
  म्हारी नजर मे ऐसी आवे एक माय दुजी मासी रे || ५ ||

• पांच इन्द्रियाँ वसकर राखो बाँधी पक्के धागे रे
  कहत कबीर सुणो रे भाई साधो जल में आग न लागे रे || ६ ||