नाथ अमली रे मारो शंकर

टेर

नाथ अमली रे मारो शंकर अमली
बागान माहिली भंगड़ली घोटाय राखुली

• काई बोवु काशीजी में काई रे प्रयाग
  काई बोवु हरकी पेड़ी काई रे कैलाश || १ ||

• काशी जी में केशर बोवु चन्दन रे प्रयाग
  हरकी पेड़ी भांग बोवु धतूरो कैलाश || २ ||

• काई मांगे नोंदियो ने काई रे गणेश
  काई मांगे भोला शंभु जोगियो रो वेश || ३ ||

• धोब मांगे नादियां ने मोदक गणेश
  भांग मांगे भोला शम्भू जोगियां रो वेश || ४ ||

• घोटे घोटे नांदियो छोणे रे गणेश
  भर भर प्याला देवे गंवरा पीवे रे महेश || ५ ||

• हरी घास तो चारे नांदियो बोले अमृतवाणी
  जे भोले री मरजी होवे तो बरसे पालर पाणी || ६ ||

• कोई चढ़ावे गंगा सागर कोई काचो दूध
  कोई चढ़ावे बिल पत्र कोई तो भभूत || ७ ||

• गावे सीखे सुने साम्भले बैकुण्ठा रा वास
  सांचे मन सु शिवजी ने ध्यावे पुरे मनरी आस || ८ ||