रंग मत डालो रे

टेर

रंग मत डालो रे सांवरिया म्हारो, गूजर मारे रे
मैं गुजरी नादाँ गूजर म्हारो, हे मतवालों रे

• होली खेले तो कान्हा, खाटू में आ जइयो रे
  राधा रूकमण न भी थारे, संग में लाज्यो रे || १ ||

• घर मत आजे कान्हा, सास बुरी छः
  नंदुली नादाँ दो की चार, लगावे रे || २ ||

• सास बुरी छः म्हारी नणद हठीली
  परण्यो बेईमान म्हाने, नित का मारे रे || ३ ||

• मैं दही बेचन जाऊँ रे वृन्दावन
  म्हारे तो मार्ग में बैठ्यो मोहन प्यारो रे || ४ ||

• चन्द्रसखी भज बाल कृष्ण छवि
  श्याम का चरणां में म्हारो, चित लाग्यो रे || ५ ||